लाच घेताना सहाय्यक पोलिस निरीक्षकाला अटक
उल्हासनगर, ता. ३ (वार्ताहर) ः एका प्रकरणात अटक टाळण्यासाठी २० हजार रुपयांची लाच घेताना उल्हासनगर पोलिस ठाण्यातील सहाय्यक पोलिस निरीक्षकाला ठाणे लाचलुचपत पथकाने ताब्यात घेतले आहे.
उल्हासनगर पोलिस ठाण्यात दाखल असलेल्या एका गुन्ह्यात तक्रारदार, त्यांचा मुलगा व पत्नी यांना अटक होऊ नये, तसेच मदत व्हावी, यासाठी सहाय्यक पोलिस निरीक्षक संजय धोंडीराम बिडगर याने २० हजार रुपयांची लाच मागितली. याबाबत ठाणे लाचलुचपत विभागाकडे तक्रार करण्यात आली होती. तक्रारीची दखल घेत पोलिस निरीक्षक रूपाली पोळ यांनी सापळा रचून संजय धोंडीराम बिडगर याला रक्कम स्वीकारताना ताब्यात घेतले. याप्रकरणी गुन्हा दाखल करण्याची कारवाई उल्हासनगर पोलिस ठाण्यात सुरू आहे. संपूर्ण कारवाई पोलिस अधीक्षक शिवराज पाटील, तसेच अपर पोलिस अधीक्षक सुहास शिंदे आणि भागवत सोनावणे यांच्या मार्गदर्शनाखाली पोलिस निरीक्षक रूपाली पोळ यांनी पार पडली.