भाजप-काँग्रेस गटात हाणामारी
भिवंडीत निवडणूक प्रचारादरम्यानची घटना
भिवंडी, ता. ३ (वार्ताहर) ः प्रचाराची रणधुमाळी सुरू असताना शनिवारी (ता. ३) सायंकाळी नारपोली भंडारी चौक या ठिकाणी प्रभाग क्रमांक २० मधील भाजप व काँग्रेस उमेदवारांच्या कार्यकर्त्यांमध्ये शाब्दिक बाचाबाची होऊन हाणामारीची घटना घडली आहे. यात दोन्ही बाजूंकडून लाठ्या- काठ्या व दगडांचा मारा केल्याने दोन जण जखमी झाले आहेत. या घटनेनंतर परिसरात तणावाचे वातावरण निर्माण झाले आहे. याठिकाणी मोठा पोलिस फौजफाटा तैनात करण्यात आला आहे.
भंडारी चौक नारपोली येथील वॉर्ड क्रमांक २० येथे भाजप उमेदवार यशवंत टावरे व काँग्रेस उमेदवार जितेंद्र पाल यांचे कार्यालय रस्त्यात समोरासमोर आहे. सायंकाळी काँग्रेस उमेदवारांची प्रचार रॅली या भागात आल्यानंतर काँग्रेस कार्यकर्त्यांनी भाजप कार्यालयाकडे जात घोषणाबाजी केली. यामुळे दोन्ही गटांतील कार्यकर्त्यांमध्ये शाब्दिक बाचाबाची झाली. त्याचे पर्यवसान हाणामारीत झाल्यानंतर दोन्हींकडून प्लॅस्टिक खुर्च्या, लाठ्या-काठ्या व दगड भिरकावण्यात आले. विशेष म्हणजे, या चौकात बंदोबस्तावर पोलिस तैनात असतानाच रॅलीतसुद्धा पोलिस होते. त्यांच्यादेखत काँग्रेस कार्यकर्त्यांनी दगडफेक केल्याचा आरोप भाजप उमेदवार यशवंत टावरे यांनी केला आहे. तर काँग्रेस नगरसेविका वैशाली म्हात्रे यांची मुलगी हर्षाली यांनी भाजप कार्यकर्त्यांनी हल्ला केल्याचा आरोप केला आहे. दरम्यान, या हाणामारीच्या घटनेनंतर नारपोली व भोईवाडा पोलिस ठाण्यातील मोठा पोलिस फौजफाटा घटनास्थळी दाखल झाला. त्यांनी सौम्य लाठीचार्ज करून परिसरातील गर्दी पांगवली. या घटनेनंतर परिसरात तणावाचे वातावरण निर्माण झाले होते. घटनास्थळी पोलिस उपायुक्त शशिकांत बोराटे, सहाय्यक पोलिस आयुक्त सचिन सांगळे यांनी भेट देत परिस्थिती शांत केली आहे. तर दोन्ही बाजूकडून पोलिस ठाण्यात गुन्हा नोंदवण्यात आला आहे.