खैरे खुर्द उर्दू शाळेत फूड फेस्टिव्हल उत्साहात
रोहा, ता. ४ (बातमीदार) : चणेरा परिसरातील खैरे खुर्द येथील राजीव गांधी प्राथमिक उर्दू शाळेत फूड फेस्टिव्हलचे आयोजन करण्यात आले. हा उपक्रम मोठ्या उत्साहात पार पडला. कार्यक्रमाचे अध्यक्षस्थान रोहा पोलिस निरीक्षक मारुती पाटील यांनी भूषविले. त्यांच्या हस्ते दीपप्रज्वलन करून कार्यक्रमाची सुरुवात करण्यात आली.
फूड फेस्टिव्हलच्या माध्यमातून विद्यार्थ्यांनी विविध खाद्यपदार्थांचे स्टॉल उभारून व्यवसाय कौशल्य, व्यवहारज्ञान व स्वावलंबनाचे धडे प्रत्यक्ष कृतीतून सादर केले. शिक्षणासोबतच व्यावहारिक ज्ञान देण्याचा शाळेचा प्रयत्न या उपक्रमातून ठळकपणे दिसून आला.
या वेळी पोलिस निरीक्षक मारुती पाटील यांनी शिस्त, शिक्षण व समाजभान यांचे महत्त्व विशद करीत अशा उपक्रमांमुळे विद्यार्थ्यांच्या सुप्त गुणांना वाव मिळतो, असे मार्गदर्शन केले.
कार्यक्रमास ग्रामपंचायत खैरे खुर्दचे सरपंच मुजम्मील गीते, पत्रकार सागर जैन, सचिन ठाकूर, तंटामुक्त समिती अध्यक्ष अरुण कोंडे, मुख्याध्यापिका सुमैया मुल्ला, चेअरमन सादिक खोत, सचिव असगर मुकादम, सल्लागार बशीर धनसे, शाळा व्यवस्थापन समिती अध्यक्ष अब्दुल हमीद गीते, पालकवर्ग व ग्रामस्थ मोठ्या संख्येने उपस्थित होते.