कल्याण-डोंबिवलीत मतदान जनजागृती मोहीम
कल्याण, ता. ४ (बातमीदार) : नागरिकांमध्ये मतदानाची जनजागृती करण्यासाठी कल्याणकर जागरूक नागरिक टीम व स्वच्छ भारत अभियान टीम यांच्या संयुक्त विद्यमानाने विशेष मोहीम राबविण्यात आली. ही मोहीम उल्हासनगरमधील श्रीराम चौक, कल्याणतील चक्की नाका ते डोंबिवलीतील घारडा सर्कलपर्यंत राबविण्यात आली.
नियोजित मार्गावर ठिकठिकाणी स्वयंसेवकांनी नागरिकांशी थेट संवाद साधून मतदानाच्या दिवशी सर्वात प्रथम मतदान करण्याचे आवाहन केले. या उपक्रमाद्वारे नागरिकांना त्यांच्या मतदान हक्काची जाणीव करून देण्यात आली. कल्याण-डोंबिवली परिसरात आगामी काळातही विविध ठिकाणी अशा जनजागृती मोहिमा राबवून मतदानाचे प्रमाण वाढविण्याचा प्रयत्न केला जाईल, असे आयोजकांकडून सांगण्यात आले. या मोहिमेत संस्थेसह, महाराष्ट्र पोलिस आणि महानगरपालिकेचे अधिकारी यांचीही उपस्थिती होती. स्थानिक नागरिकांनीही उत्स्फूर्त सहभाग घेऊन लोकशाही बळकट करण्याचा संदेश या मोहिमेतून दिला आहे.