‘ती’ यादी पक्षश्रेष्ठींकडे
कल्याण-डोंबिवली महायुतीतील बंडखोरी
कल्याण, ता. ४ (वार्ताहर) : महापालिका निवडणुकीत बंडखोरी आणि पक्षविरोधी काम करणाऱ्यांची यादी करण्यात आली आहे. यासंदर्भात महायुतीतील शिवसेना शिंदे गट-भाजपचे पक्षश्रेष्ठी निर्णय घेतील, अशी माहिती शिंदे गटाचे कल्याण शहरप्रमुख रवी पाटील यांनी दिली.
कल्याण-डोंबिवलीत महायुतीतील शिवसेना शिंदे गट-भाजप एकत्र निवडणूक लढत आहेत. निवडणुकीत अनेक जण इच्छुक होते. त्यामध्ये बहुतांश इच्छूकांना शिवसेना- भाजप नेत्यांनी अर्ज मागे घ्यायला लावला; परंतु अद्याप काही बंडखोर आहेत. त्यांनी त्यांची उमेदवारी मागे घेतली नाही. त्यासोबतच असेही काही लोक आहेत जे पक्षात राहून पक्षविरोधी काम करीत आहेत, अशा लोकांची एक यादी तयार करून शिवसेना- भाजपच्या वरिष्ठ नेत्यांना पाठवण्यात आली आहे. काही तासांत त्यांच्यावर पक्षश्रेष्ठी निर्णय घेईल, असे विधान शिवसेना शिंदे गटाचे कल्याण शहरप्रमुख रवी पाटील यांनी केले आहे. शिवसेना- भाजपमध्ये कल्याण-डोंबिवलीत ५५ ते ६० लोक असे आहेत जे बंडखोरी करून निवडणूक लढत आहे. तर काही लोक पक्षात राहून पक्षविरोधी काम करीत आहेत. यामुळे बंडखोरी आणि पक्षविरोधी काम करणाऱ्यांवर दोन्ही पक्ष कडक कारवाई करणार, हे निश्चित मानले जात आहे.