मिरा-भाईंदरमध्ये भाजप-एमआयएमची युती!
परिवहनमंत्री प्रताप सरनाईक यांचा पलटवार

भाईंदर, ता. ४ (बातमीदार)ः मिरा-भाईंदर महापालिकेसाठी काँग्रेस व शिवसेनेची युती झाली असल्याचा आरोप शनिवारी (ता. ३) भाजपचे आमदार नरेंद्र मेहता यांनी केला होता. त्याला प्रत्युत्तर देताना भाजपची एमआयएमशी युती झाली असल्याचा आरोप परिवहनमंत्री प्रताप सरनाईक यांनी केला आहे. भाजपकडून एमआयएमच्या उमेदवारांना आर्थिक रसदही पुरवली जात असल्याचे सरनाईक यांनी रविवारी (ता. ४) सांगितले.

मिरा भाईंदरमध्ये निवडणुकीचे वातावरण तापू लागले आहे. मुंबई व ठाण्यात भाजप-शिवसेनेत युती झालेली असताना मिरा-भाईंदरमध्ये मात्र ती होऊ शकली नाही. त्यामुळे आमदार नरेंद्र मेहता व परिवहनमंत्री प्रताप सरनाईक हे दोघेही एकमेकांसमोर उभे ठाकले आहेत. एकमेकांवर आरोपांच्या फैरी झाडू लागले आहेत. दोघेही महापालिकेत स्वबळावर सत्ता स्थापन करण्याचा दावा करीत आहेत. यामुळे दोन्ही पक्षांतील संघर्ष टोकाला पोहोचला आहे. शिवसेनेने काँग्रेसच्या काही उमेदवारांसमोर आपले उमेदवार उभे केलेले नाही, तर उमेदवारी मागे घेण्याच्या शेवटच्या दिवशी काँग्रेसने आपले अधिकृत उमेदवार अचानक मागे घेतले. त्या ठिकाणी काँग्रेस शिवसेनेला मदत करीत आहे, असा आरोप मेहता यांनी केला होता.

आर्थिक मदत
त्याला प्रत्युत्तर देतान सरनाईक म्हणाले, की भाजपने नयानगर येथील प्रभाग ९ व २२मध्ये उमेदवारच उतरवलेले नाहीत. या ठिकाणी एमआयएमचे उमेदवार निवडणूक लढवत आहेत. त्यांना आर्थिक मदत भाजपकडून केली जात आहे. शिवसेना ८१ जागांवर निवडणूक लढवत आहे. काही ठिकाणी शिवसेनेची थेट लढत काँग्रेससोबत आहे. असे असताना शिवसेनेची प्रतिमा मलिन करण्यासाठी नरेंद्र मेहता खोटे आरोप करीत आहेत, अशी टीका सरनाईक यांनी केली.