ठाणे ग्रामीण जिल्ह्यात नायलॉनवर बंदी
१ ते ३० जानेवारीपर्यंत मनाई आदेश लागू
टोकावडे ता. ५ (बातमीदार) ः मकर संक्रांत सणाच्या पार्श्वभूमीवर सुरक्षिततेच्या दृष्टीने ठाणे ग्रामीण जिल्ह्यात नायलॉनपासून बनविलेल्या आणि काचेची खर लावून तयार केलेल्या मांजाच्या वापर-विक्री व साठ्यावर बंदी घालण्यात आली आहे. जिल्हाधिकारी डॉ. श्रीकृष्ण पांचाळ यांनी हे मनाई आदेश जारी केले आहेत.
मकर संक्रांत सणानिमित्त पतंग उडविताना नायलॉन किंवा काचेची खर लावलेल्या मांजामुळे पशू-पक्ष्यांना गंभीर इजा होते. तसेच, मानवी अपघात देखील घडतात. तसेच विद्युत तारांशी घर्षण होऊन आग लागणे, वीजपुरवठा खंडित होणे व उपकरणांचे नुकसान होण्याच्या घटना लक्षात घेऊन हा निर्णय घेण्यात आला आहे. ३० जानेवारीपर्यंत हा आदेश ठाणे ग्रामीण जिल्ह्यातील सर्व पोलिस स्थानक हद्दीत लागू राहणार आहे.
संबंधित आदेशाचे उल्लंघन केल्यास संबंधितांविरोधात कायदेशीर कारवाई करण्यात येणार असल्याचेही आदेशात स्पष्ट करण्यात आले आहे. सुरक्षिततेच्या दृष्टीने पर्यावरणपूरक व कायदेशीर पतंगमांजाच वापरावा, असे आवाहन जिल्हा प्रशासनाकडून करण्यात आले आहे.