डोंबिवलीत स्वामी विवेकानंद व्याख्यानमालेचे आयोजन
सकाळ वृत्तसेवा
डोंबिवली, ता. ८ ः राष्ट्रीय शिक्षण संस्थेच्या वतीने स्वामी विवेकानंद व्याख्यानमाला व पुरस्कार प्रदान सोहळ्याचे आयोजन करण्यात आले आहे. शनिवारी (ता. १०) ते सोमवारी (ता. १२) अशी तीन दिवस ही व्याख्यानमाला होणार असून आयुर्वेदाचार्य रामचंद्र गोडबोले यांना स्वामी विवेकानंद पुरस्कार प्रदान केला जाणार आहे.
शनिवारी विज्ञान प्रसारक डॉ. जयंत वसंत जोशी यांचे ‘वंदेमातरम्’ या विषयावर व्याख्यान होणार आहे. रविवारी पूर्व सीमा विकास प्रतिष्ठानचे प्रणेते जयवंत कोंडविलकर यांचे ‘धुमसता ईशान्य भारत’ या विषयावर व्याख्यान होईल. तर, सोमवारी स्वामी विवेकानंद जयंतीनिमित्त पुरस्कार प्रदान केला जाणार आहे. छत्तीसगडमधील बस्तर भागातील वंचित आदिवासी समाजासाठी वैद्यकीय सेवा पुरविणारे रामचंद्र गोडबोले यांना हा पुरस्कार प्रदान करण्यात येणार आहे.
ही व्याख्यानमाला स्वामी विवेकानंद विद्यामंदिर येथे होणार असून पहिले दोन दिवस सायंकाळी सात वाजता तर पुरस्कार समारंभ सायंकाळी ६.३० वाजता होईल. तसेच, तीनही दिवस ठाणे जिल्ह्यातील पहिली नाविन्यपूर्ण मॅथ्स एक्झिबिशन देखील आयोजित करण्यात आली आहे.