संरक्षक भिंतीवरून घिवलीत उद्रेक
आठ किलोमीटरचा फेरा मारण्याची ग्रामस्थांवर वेळ
बोईसर, ता. १० (वार्ताहर) ः भाभा अणुसंशोधन केंद्र (बार्क) व न्यूक्लियर पॉवर कॉर्पोरेशन ऑफ इंडिया लिमिटेड (एनपीसीआयएल) यांच्या वतीने उभारण्यात येत असलेल्या संरक्षक भिंतीमुळे घिवली गावात असंतोष पसरला आहे. या बांधकामामुळे वडिलोपार्जित, वापरात असलेला रस्ता बंद होण्याच्या मार्गावर असून नागरिकांना आता सुमारे आठ किलोमीटरचा फेरा मारावा लागण्याची शक्यता आहे.
बार्क, टीएपीएस, जीएसओ, एनपीसीआयएल कंपनीने अधिकाऱ्यांसोबत झालेल्या बैठकीत ग्रामस्थांना पूर्वसूचना, स्थानिक युवकांसाठी कौशल्य प्रशिक्षण, विद्यार्थ्यांसाठी शैक्षणिक प्रवेश आणि रोजगारात प्राधान्य देण्याबाबत निर्णय घेण्यात आले होते; मात्र निर्णयाची अंमलबजावणी झालेली नसल्याचा आरोप ग्रामस्थांनी केला आहे. तसेच वडिलोपार्जित रस्ता कायमस्वरूपी ठेवावा, स्थानिकांना कायमस्वरूपी नोकरी द्यावी आणि प्रशासनाने लेखी हमी द्यावी, अशी मागणी करीत ग्रामस्थांनी आंदोलन करण्याचा इशारा दिला आहे.
----------------------------------------
ग्रामस्थांमध्ये रोष
संरक्षक भिंत वस्तीच्या जवळ उभारण्यात येत असल्याने नागरिकांच्या सुरक्षिततेचा प्रश्न निर्माण झाला आहे. परिसरात रेडिएशनबाबत भीती असून आरोग्यविषयक त्रास वाढण्याची शक्यता व्यक्त आहे. तसेच या प्रकल्पात बहुतांश नोकऱ्या परप्रांतीयांना दिल्याने ग्रामस्थांमध्ये रोष आहे.
----------------------------------------
रस्ता जसा आहे तसा कायमस्वरूपी ठेवण्यात यावा, तसेच त्यामध्ये कोणताही बदल, अडथळा, बंद किंवा पर्यायी मार्ग लादण्यात येऊ नये, तसेच कायमस्वरूपी नोकरी, अशी मागणी आहे.
- भावेश धर्ममेहेर, उपसरपंच, घिवली