१०५ ड्रोनद्वारे हवाई पाळत
संवेदनशील प्रभागांवर २४ तास लक्ष
सकाळ वृत्तसेवा
ठाणे, ता. १० : ठाणे, भिवंडी, कल्याण-डोंबिवली आणि उल्हासनगर या महापालिकांच्या आगामी निवडणुकीसाठी ठाणे शहर पोलिसांनी सुरक्षेचे कडेकोट नियोजन केले आहे. यंदाच्या निवडणुकीत तंत्रज्ञानाचा मोठा वापर करण्यात येणार असून, संपूर्ण पोलिस आयुक्तालय क्षेत्रात १०५ ड्रोनद्वारे हवाई पाळत ठेवली जाणार आहे. सुरक्षेला आधुनिक कवच देण्यासाठी प्रत्येक पोलिस ठाण्याला किमान तीन ड्रोन वापरण्याचे आदेश देण्यात आले आहेत.

विधानसभा निवडणुकीच्या धर्तीवर महापालिका निवडणुकीतही ड्रोनचा वापर करण्याचा महत्त्वाकांक्षी निर्णय घेण्यात आला आहे. प्रत्येक पोलिस ठाण्यातील निवडक कर्मचाऱ्यांना ड्रोन चालवण्याचे विशेष प्रशिक्षण देण्यात आले आहे. या ड्रोनद्वारे मिळणारे चित्रीकरण थेट पोलिस नियंत्रण कक्षाला दिसणार आहे. कोणत्याही आपत्तीच्या वेळी किंवा वादाच्या प्रसंगी हे व्हिडिओ चित्रीकरण महत्त्वाचा पुरावा म्हणून वापरता येणार असल्याचे वरिष्ठ अधिकाऱ्यांनी स्पष्ट केले आहे. शांतता, सुरक्षितता आणि पारदर्शकता या त्रिसूत्रीवर ही निवडणूक पार पडणार आहे.

संवेदनशील भाग
मतदान केंद्र परिसर, अतिसंवेदनशील क्षेत्र आणि दाट वस्तीच्या भागात २४ तास निरीक्षण.

प्रचार आणि रॅली
राजकीय पक्षांच्या प्रचार फेऱ्या, रॅली आणि विजयी मिरवणुकांवर हवाई नजर

गर्दी आणि वाहतूक
गर्दीचे नियंत्रण करणे आणि वाहतूक कोंडीचे विश्लेषण करून तातडीने उपाययोजना करणे

समाजकंटकांवर वचक
संशयास्पद हालचाली टिपणे आणि टवाळखोरांवर नजर ठेवून नियंत्रण कक्षाला ‘लाइव्ह’ माहिती पुरवणे

विधानसभेप्रमाणे महापालिका निवडणुकीसाठी ड्रोनचा वापर केला जात आहे. प्रत्येक पोलिस ठाण्याच्या पातळीवर किमान तीन आणि उपलब्ध होतील तितक्या जास्तीत जास्त ड्रोनचा वापर करून प्रत्येक हालचालींवर लक्ष ठेवण्याच्या सूचना दिल्या आहेत. सुरक्षिततेसाठी ही चोख व्यवस्था असेल.
- आशुतोष डुंबरे, पोलिस आयुक्त, ठाणे शहर