वसईतून चोरट्याला अटक
ठाणे, ता. ११ : ठाणे रेल्वे स्थानकातील फलाटावरून प्रवाशाची सॅकबॅग लंपास करणाऱ्या चोरट्याला जेरबंद करण्यात ठाणे लोहमार्ग पोलिसांना यश आले आहे. संतोष गौतम (वय २६) असे अटक केलेल्या आरोपीचे नाव असून, तो वसईचा रहिवासी आहे. पोलिसांनी त्याच्याकडून चोरीचा मुद्देमालही हस्तगत केला आहे. १ डिसेंबर २०२५ रोजी ठाणे रेल्वे स्थानकातील फलाट क्रमांक ८ वरील पाणपोईजवळून एका प्रवाशाची सॅकबॅग चोरीला गेली होती. याप्रकरणी ठाणे लोहमार्ग पोलीस ठाण्यात गुन्हा दाखल करण्यात आला होता. तपास सुरू असताना पोलीस हवालदार सुतार, शेळके आणि राऊत यांना संतोष गौतमच्या हालचाली संशयास्पद वाटल्या. त्याला ताब्यात घेऊन अधिक चौकशी केली असता त्याने चोरीची कबुली दिली.
पोलिसांनी आरोपीकडून २६ हजार ५०० रुपये किमतीचा मुद्देमाल जप्त केला. यात चांदीचे पैंजण, कानातील कर्णफुले, नाकातील नथणी, गुलाबी रंगाचे पाकीट आणि रोख दोन हजार रुपयांचा समावेश आहे. ही कारवाई वरिष्ठ पोलिस निरीक्षक अर्चना दुसाने व सहाय्यक पोलिस निरीक्षक देशमुख यांच्या मार्गदर्शनाखाली करण्यात आली. बुधवारी (ता. ७) रोजी पोलिसांनी ही यशस्वी कामगिरी करत गुन्ह्याचा छडा लावला.