ठाण्यात माय-लेकींच्या पुस्तकांचे प्रकाशन
ठाणे, ता. १३ (बातमीदार) : सद्यकाळातील स्त्रियांच्या बदलत्या समस्या आणि त्या सोडवण्यासाठी स्त्रियांमध्ये असलेली उपजत क्षमता याचे प्रभावी चित्रण करणाऱ्या मेघना साने लिखित ‘तिला काय हवंय!’ या कथासंग्रहाचे प्रकाशन ठाण्यात मोठ्या उत्साहात पार पडले. रविवारी (ता. ११) मराठा मंडळ सभागृहात झालेल्या या सोहळ्याला साहित्यप्रेमींनी मोठी गर्दी केली होती. कार्यक्रमाच्या अध्यक्षस्थानी महाराष्ट्र साहित्य आणि संस्कृती मंडळाच्या सचिव डॉ. मीनाक्षी पाटील होत्या. या वेळी प्रमुख पाहुण्या म्हणून लेखिका-अभिनेत्री संपदा जोगळेकर कुळकर्णी आणि गझलकार प्रा. प्रतिभा सराफ उपस्थित होत्या.

डॉ. मीनाक्षी पाटील यांनी या वेळी म्हटले की, या कथा निव्वळ स्त्रीवादी नाहीत, तर त्या स्त्रीला जागं करणाऱ्या आहेत. यातील नायिका सुशिक्षित आणि सक्षम असून, ती स्वतःच्या प्रश्नांची उत्तरे स्वतः शोधते. तर संपदा जोगळेकर यांनी कथांमधील भावनिक सूक्ष्मता उलगडून सांगत उपस्थितांना पुस्तक वाचण्याचे आवाहन केले. तर प्रा. प्रतिभा सराफ यांनी मेघना साने यांच्या बहुआयामी व्यक्तिमत्त्वाचे प्रतिबिंब त्यांच्या लेखनातून उमटल्याचे नमूद केले.

कार्यक्रमात मेघना साने यांची कन्या सायली केळकर हिच्या ‘द एकॉस ऑफ अवेकिंग’ या इंग्रजी कवितासंग्रहाचेही प्रकाशन करण्यात आले. आई आणि मुलीच्या पुस्तकांचे प्रकाशन एकाच व्यासपीठावर होण्याचा दुर्मिळ योग या वेळी जुळून आला. या सोहळ्याला डॉ. अनंत देशमुख, डॉ. मेधा सोमण, देवेंद्र भुजबळ, नितीन केळकर यांसह साहित्य आणि कला क्षेत्रातील अनेक मान्यवर उपस्थित होते. कार्यक्रमाचे सूत्रसंचालन तपस्या नेवे यांनी केले, तर हेमंत साने यांनी आभार मानले.