प्रियंका म्हसकर यांची भरारी

बोर्डी (बातमीदार) : पालघर जिल्ह्याच्या शिरपेचात आणखी एक मानाचा तुरा रोवला गेला आहे. डहाणू तालुक्यातील दाभोण येथील प्रियंका अनंता म्हसकर यांनी महाराष्ट्र लोकसेवा आयोगाच्या (एमपीएससी) परीक्षेतून ‘ गटविकास अधिकारी ’ (बीडीओ - प्रथम श्रेणी) पदाला गवसणी घातली आहे. आदिवासी महिला प्रवर्गातून महाराष्ट्रात द्वितीय क्रमांक पटकावणाऱ्या प्रियंका यांचा डहाणू येथील करंदीकर महाविद्यालयाच्या वतीने नुकताच गौरव करण्यात आला. प्रियंका म्हसकर यांचा आतापर्यंतचा प्रवास अत्यंत जिद्दीचा राहिला आहे. सध्या त्या डहाणू येथेच महसूल विभागात ग्राम महसूल अधिकारी (तलाठी) म्हणून कार्यरत आहेत. सरकारी नोकरीची जबाबदारी सांभाळत असतानाच त्यांनी आपले अधिकारी होण्याचे स्वप्न कायम राखले. २०२४ च्या राज्यसेवा परीक्षेत त्यांनी पूर्व, मुख्य आणि मुलाखत अशा तिन्ही टप्प्यांवर यशस्वी मोहर उमटवत, थेट ‘ गटविकास अधिकारी ’ म्हणून प्रशासकीय सेवेत प्रवेश मिळवला आहे.