जिजा इलेव्हनचे विजेतेपद
पोयनाड, ता. १४ (बातमीदार) : अलिबाग तालुक्यातील शहाबाज येथे झालेल्या ग्रामीण बिग बॅश लीग क्रिकेट स्पर्धेत जिजा इलेव्हन कमळपाडा संघाने अंतिम विजेतेपद पटकावले. शहाबाज खारेपाट क्रिकेट असोसिएशनने आयोजित दोनदिवसीय डे-नाइट क्रिकेट स्पर्धेचे उद्घाटन माजी आमदार पंडित पाटील, आस्वाद पाटील, चित्रा पाटील, जनार्दन पाटील, भूपेंद्र पाटील, प्रवीण पाटील व संदेश बैकर यांच्या हस्ते झाले.
स्पर्धेत मन इलेव्हन पेझारी, श्रीयांक स्ट्राईकर्स, किट्टू इलेव्हन शहाबाज, बीजे एन्टरप्राइझेस, जिजा डेव्हलपर्स, केईएस कट्टा, डीएम ग्रुप शहाबाज, जिजा इलेव्हन कमळपाडा व शिवशंभो घसवड असे नऊ संघ सहभागी झाले होते. उत्कृष्ट कामगिरीच्या जोरावर जिजा इलेव्हन कमळपाडा प्रथम, बीजे एन्टरप्राइझेस द्वितीय व शिवशंभो घसवड तृतीय क्रमांकावर राहिले. सर्व विजेत्या संघांचा विशेष पारितोषिकांनी गौरव करण्यात आला. स्पर्धेच्या यशस्वी आयोजनासाठी शहाबाज खारेपाट क्रिकेट असोसिएशनचे पदाधिकारी व सदस्यांनी परिश्रम घेतले.