मकर संक्रातींच्या निमित्ताने मतदारांच्या भेटीगाठी

मुंबई, ता. १४ : मुंबईच्या शहरासह उपनगरात आज मोठ्या प्रमाणात मकर संक्रांतीचा सण सर्वत्र मोठ्या उत्साहात साजरा झाला. प्रभागांमध्ये मकर संक्रांतीच्या कार्यक्रमाची रेलचेल होती. निवडणुकीच्या आचारसंहितेच्या काळात हा सण आल्याने या सणाला व्यापक स्वरूप प्राप्त झाले होते. अधिकाधिक मतदारांशी संपर्क साधण्याची आयती संधी या सणाच्या निमित्ताने उमेदवारांना मिळाली. मुंबईतील विविध गृहनिर्माण सोसायट्यांमध्ये मकर संक्रांतीच्या कार्यक्रमांचे आयोजन करण्यात आले होते. या सणाच्या निमित्ताने उमेदवारांनी मतदारांशी संपर्क साधत भेटीगाठी घेतल्या. त्यातच विविध ठिकाणी हळदी-कुंकू समारंभ आयोजित करण्यात आले होते. या सणाच्या निमित्ताने वाण देण्याची प्रथा आहे. त्या माध्यमातून महिलांना भेटवस्तू दिल्या गेल्या. एकंदरीत मकर संक्रांतीचे औचित्य साधत सर्वच राजकीय पक्षांच्या उमेदवारांनी मतदारांच्या भेटीगाठी घेतल्या.