विक्रोळीत बोगस मतदान?
मतदाराच्या नावावर सकाळीच मतदान झाल्याचा धक्कादायक प्रकार
घाटकोपर, ता. १५ (बातमीदार) ः विक्रोळीतील टागोर नगर परिसरातील प्रभाग क्रमांक ११९ मध्ये मतदार मतदान करण्यासाठी गेला असता त्‍याच्या नावावर सकाळीच मतदान झाल्याचा धक्‍कादायक प्रकार समोर आला आहे. त्‍यामुळे इथे बोगस मतदान झाल्‍याचा आरोप करण्यात येत आहे.
टागोर नगर येथील सिद्धिविनायक शाळेतील मतदान केंद्रावर हा प्रकार उघडकीस आला. मतदार राजेश शुक्ला हे दुपारी सुमारे १२ वाजता मतदानाचा हक्क बजावण्यासाठी मतदान केंद्रावर गेले असता, त्यांच्या नावावर सकाळीच मतदान झाल्याची नोंद असल्याचे अधिकाऱ्यांकडून सांगण्यात आले. त्यामुळे शुक्ला यांना मोठा धक्का बसला. ही बाब तत्काळ निवडणूक अधिकाऱ्यांच्या निदर्शनास आणून दिल्यानंतर अधिकाऱ्यांनी त्यांना बॅलेट पेपरद्वारे मतदान करण्याची मुभा दिली. मात्र, या बॅलेटद्वारे केलेले मतदान प्रत्यक्षात ग्राह्य धरले जाईल की नंतर रद्द केले जाईल, याबाबत शुक्ला यांनी प्रतिक्रिया देताना संशय व्यक्त केला आहे. मतदाराच्या नावावर दुसऱ्याने मतदान केल्याचा हा प्रकार गंभीर असून, संबंधित प्रकरणाची सखोल चौकशी करून दोषींवर कठोर कारवाई करण्यात यावी, अशी मागणी नागरिकांकडून केली जात आहे.