घराचे प्लास्टर पडल्याने १६ वर्षीय मुलगी जखमी
ठाणे, ता. १५ : ठाण्यातील कोर्टनाका परिसरातील जुन्या पोलिस कॉलनीमध्ये बुधवारी (ता. १४) रात्री घराच्या छताचे प्लास्टर कोसळल्याची दुर्घटना घडली. या दुर्घटनेत तनिष्का गुरव (१६) ही मुलगी जखमी झाली असून, तिच्यावर रुग्णालयात उपचार सुरू आहेत. जिल्हा सत्र न्यायालयाच्या शेजारी असलेल्या या ३५ वर्षे जुन्या पोलिस वसाहतीत पोलिस हवालदार सुनील गुरव यांचे कुटुंब ''ई'' इमारतीमधील तिसऱ्या मजल्यावर वास्तव्यास आहे. बुधवारी रात्री ११:१५ च्या सुमारास घराच्या सिलिंगमधील प्लास्टरचा मोठा भाग अचानक तनिष्काच्या अंगावर पडला. यामध्ये तिच्या डोक्याला आणि मानेला दुखापत झाली आहे.
घटनेची माहिती मिळताच गौरव नामक दक्ष नागरिकाने महापालिका आपत्ती व्यवस्थापन कक्षाला कळवले. त्यानंतर आपत्ती व्यवस्थापन कक्ष आणि सार्वजनिक बांधकाम विभागाचे विभागीय अभियंता चौधरी यांनी तातडीने घटनास्थळी धाव घेतली. जखमी तनिष्का हिला तत्काळ कळवा येथील छत्रपती शिवाजी महाराज रुग्णालयात दाखल करण्यात आले. तिची प्रकृती स्थिर असून, तिला किरकोळ दुखापत झाल्याचे डॉक्टरांनी सांगितले. खबरदारीचा उपाय म्हणून गुरव कुटुंबाला तात्पुरत्या स्वरूपात दुसऱ्या ठिकाणी स्थलांतरित होण्याच्या सूचना प्रशासनाकडून देण्यात आल्या आहेत.