सरळगाव, ता. १५ (बातमीदार) : मुरबाड तालुक्यातील जिल्हा परिषद शाळा काळाची पावले ओळखत हळूहळू कात टाकत आहे. विद्यार्थी केंद्रस्थानी ठेवून जिल्हा परिषदेच्या माध्यमातून अनेक सकारात्मक आणि आधुनिक निर्णय राबवले जात आहेत. शिक्षण अधिक प्रभावी, दर्जेदार आणि तंत्रज्ञानस्नेही व्हावे, या उद्देशाने मुरबाड तालुक्यातील तब्बल २३ जिल्हा परिषद शाळा आता डिजिटल होणार आहेत.
शाळांचे डिजिटलीकरण करण्यासाठी तत्कालीन पालकमंत्री शंभूराज देसाई यांच्या विकास निधीतून नावीन्यपूर्ण योजनेअंतर्गत ‘रिअल इंटरप्रायझेस’ तसेच ‘होम रिवाईज’ या संस्थांच्या माध्यमातून नुकतेच ‘ऑल इन वन’ प्रोजेक्टरचे वाटप करण्यात आले आहे. या प्रोजेक्टरच्या माध्यमातून विद्यार्थ्यांना दृकश्राव्य शिक्षणाची सुविधा उपलब्ध होणार असून, अध्यापन अधिक सुलभ आणि परिणामकारक ठरणार आहे. या उपक्रमाचा लाभ मुरबाड तालुक्यातील भुवन, जांभुर्डे, कोरावळे, म्हसा, देवगाव, टाकीचीवाडी, शास्त्रीनगर, मुरबाड-२, माळीपाडा, शिरगाव, कुडवली, कोळठण, मानिवली (गो.), शिरवली, खेवारे महाज, खोपिवली, वैशाखरे, डोंगरन्हावे, पाटगाव, सोनावळे, खापरी आदी २३ जिल्हा परिषद शाळांना मिळणार आहे.

आधुनिक शिक्षण
डिजिटल उपक्रमासाठी आवश्यक पाठपुरावा करून ही मदत मिळवून देण्यासाठी ज्ञानेश्वर ठाकरे (भुवन), भालचंद्र ठाकरे आणि तुषार तुंगार यांनी मोलाचे योगदान दिले आहे. त्यांच्या या प्रयत्नांमुळे ग्रामीण भागातील विद्यार्थ्यांना आधुनिक शिक्षणाची संधी उपलब्ध होणार आहे. शिक्षणाच्या गुणवत्तेत लक्षणीय सुधारणा होण्याची अपेक्षा व्यक्त केली जात आहे. डिजिटल शिक्षणामुळे ग्रामीण भागातील विद्यार्थ्यांनाही आधुनिक तंत्रज्ञानाच्या माध्यमातून स्पर्धात्मक युगात सक्षम बनवण्याच्या दिशेने मुरबाड तालुक्याने एक महत्त्वाचे पाऊल उचलल्याची भावना व्यक्त होत आहे.