सेंट झेवियर्स शाळेत ईव्हीएमला शॉक
ठाणे, ता. १५ : महापालिका निवडणुकीच्या मतदानादरम्यान प्रभाग क्रमांक ३ मधील एका केंद्रावर चक्क मतदान यंत्राला विद्युतप्रवाह लागत असल्याचा धक्कादायक प्रकार समोर आला. यामुळे काही काळ मतदारांमध्ये भीतीचे वातावरण निर्माण झाले होते. मानपाडा परिसरातील सेंट झेवियर्स शाळेत असलेल्या मतदान केंद्रावर (खोली क्रमांक १० आणि १२) सकाळी मतदानाला सुरुवात झाली. मात्र थोड्याच वेळात येथील दोन यंत्रांमध्ये बिघाड झाला. खोली क्रमांक १२ मधील मतदान यंत्राला स्पर्श केला असता चक्क शॉक लागत असल्याचे लक्षात आले. सुरक्षेच्या कारणास्तव येथील मतदान तातडीने थांबवण्यात आले. तर खोली क्रमांक १० मधील यंत्रातही तांत्रिक एरर आल्याने मतदारांचा खोळंबा झाला.