कळव्यात शिवसेना शिंदे गटाला धक्का
माजी नगरसेवक उमेश पाटील पराभूत
सकाळ वृत्तसेवा
ठाणे, ता. १६ : कळव्यात शिवसेना शिंदे गटाला धक्का बसला आहे. येथील प्रभाग क्रमांक ९ मधील पॅनेल ‘ड’चे उमेदवार माजी नगरसेवक उमेश पाटील यांना पराभवाला सामोरे जावे लागले आहे. राष्ट्रवादी शरद पवार गटाचे अभिजित पवार यांनी पाटील यांचा दोन हजार ५७८ मतांनी पराभव केला आहे. या पॅनेलमध्ये तीन उमेदवार शिवसेना शिंदे गटाचे निवडून आले असताना, एक जागा गमवावी लागल्याने पूर्ण पॅनेल विजयाचे स्वप्न भंगले आहे.
कळव्यातील प्रभाग क्रमांक ९ हा शिवसेनेचा गड समजला जातो. गेल्या निवडणुकीत या प्रभागातून चारही पॅनेलवर शिवसेनेने विजय मिळवला होता. त्यामुळे या वेळी शिवसेना शिंदे गटाने माजी नगरसेवकांना पुन्हा संधी दिली होती. त्यापैकी विजया लासे, अनिता गौरी आणि गणेश कांबळी यांनी विजय मिळवला आहे. उमेश पाटील यांना मात्र पराभव स्वीकारावा लागला आहे. पाटील यांना १२ हजार २९९ मते मिळाली, तर राष्ट्रवादी शरद पवार गटाचे अभिजित पवार यांना १४ हजार ८७७ मते मिळाली आहेत. शिवसेना शिंदे गट आणि उमेश पाटील यांना हा मोठा धक्का समजला जात आहे.