वंचित-काँग्रेस निर्णायक भूमिकेत
उल्हानगरमध्ये भाजप-शिवसेनेला प्रत्येकी ३७ जागा
ठाणे, ता. १६ : उल्हासनगर पालिकेच्या निवडणुकीत महायुती फिस्कटल्याने शिवसेना, टीम ओमी कलानी व साई पक्षाची आघाडी आणि भाजपमध्ये थेट लढत झाली. त्यामुळे दोन्ही पक्षांना प्रत्येकी ३७ जागा मिळाल्या. वंचितला दोन आणि काँग्रेसने केवळ एका जागेवर विजय मिळविला आहे. ठाकरे बंधूंना खातेही उघडता आले नाही; मात्र तरीही सत्तेचे गणित जुळवण्यासाठी काँग्रेस, वंचित आणि इतरांची भूमिका निर्णायक असणार आहे.
ठाणे, कल्याण-डोंबिवली पालिका वगळता अन्य ठिकाणी शिवसेना व भाजप हे स्वतंत्रपणे निवडणुकीला सामोरे गेले. उल्हानगरमध्ये भगवा फडकवण्यासाठी शिवसेना शिंदे गटाने टीम ओमी कलानी आणि साई पक्षासोबत मोट बांधत भाजपला आव्हान दिले. त्यामुळे उल्हासनगरमध्ये भाजप आणि शिवसेना आघाडीत थेट लढत झाली. मतदानाच्या दिवशी अचानक मतांचा टक्का वाढल्याने हे मतदान कुणाच्या पारड्यात जाते, याकडे लक्ष लागले होते.
---
‘साई’ला एकच जागा
मागील निवडणुकीत किंगमेकरच्या भूमिकेत राहिलेल्या साई पक्षाला यंदा अपेक्षित यश मिळाले नाही. साई पक्षाने शिवसेना शिंदे आणि टीम ओमी कलानीसोबत आघाडी केली, तरी अनेक ठिकाणी ‘साई’पुढे टीम कलानीचे उमेदवार शिवसेनेच्या चिन्हावर रिंगणात होते. त्यामुळे मतविभागणी होऊन त्याचा फटका साईला बसला. त्यामुळे दीप्ती दुधानी या साई पक्षाच्या एकमेव उमेदवार विजयी झाल्या.