प्रबोधिनी ट्रस्टतर्फे प्रमिला कोकड सन्मानित
जव्हार, ता. १७ (बातमीदार) ः रजनी लिमये यांच्या स्मृतिदिनानिमित्त प्रबोधिनी ट्रस्ट यांच्या वतीने ‘दरवळ रजनीगंधाचा’ हा सोहळा शुक्रवारी (ता. १६) नाशिक येथे उत्साहात पार पडला. या वेळी दिव्यांग मुलांच्या शिक्षण व पुनर्वसनासाठी उल्लेखनीय कार्य करणाऱ्या जव्हार येथील दिव्य विद्यालय सचिव प्रमिला कोकड यांना १० हजार रुपये व मानचिन्ह देऊन सन्मानित करण्यात आले.
जव्हार येथील दिव्य विद्यालय गुलमोहोरच्या माध्यमातून अंध व मतिमंद विद्यार्थ्यांच्या सर्वांगीण विकासासाठी सुरू असलेले कार्य समाजासाठी दिशादर्शक ठरत असून, या सन्मानामुळे संस्थेच्या कार्याला नवी ऊर्जा मिळाली असल्याचे कोकड यांनी याप्रसंगी सांगितले. कोकड यांना यापूर्वी राष्ट्रपती प्रतिभा पाटील यांच्या हस्तेदेखील सन्मानित करण्यात आले आहे. कार्यक्रमास विविध सामाजिक संस्थांचे प्रतिनिधी, शिक्षक, पालक व नागरिक मोठ्या संख्येने उपस्थित होते.