रस्तेकामात निष्काळजीचा आरोप
वाडा (बातमीदार)ः भिवंडी-वाडा-मनोर या मुख्य मार्गाचे काम सुरू असताना ठेकेदार कंपनी आणि सार्वजनिक बांधकाम विभागाकडून सुरक्षेच्या उपाययोजना केल्या नसल्याने निष्पाप नागरिकांचे बळी जात असल्याचा गंभीर आरोप करीत काँग्रेसतर्फे करण्यात आली आहे. गेल्या अनेक दिवसांपासून रस्ता खोदकाम सुरू असून, ठिकठिकाणी चिखल, खड्डे, उघडी बाजू आणि कोणतेही सूचना फलक, बॅरिकेड्स किंवा सुरक्षेची साधने लावण्यात आलेली नाहीत. या निष्काळजीमुळे खुपरी येथे एका २५ वर्षीय मुलाचा अपघाती मृत्यू झाला होता. या प्रकरणात सदोष मनुष्यवधाचा गुन्हा दाखल करावा, अशी मागणी पालघर जिल्हा काँग्रेसचे जिल्हाध्यक्ष प्रफुल पाटील यांनी वाडा पोलिसांना दिलेल्या निवेदनातून केली आहे.