आस्था थिटेचा राज्यस्तरीय सन्मान
रोहा, ता. १९ (बातमीदार) : रोहा तालुक्यातील नवजीवन शिक्षण प्रसारक मंडळ खांब संचालित श्रमिक विद्यालय, चिल्हे येथे इयत्ता आठवीत शिक्षण घेत असलेली विद्यार्थिनी आस्था विनोद थिटे हिला राज्यस्तरीय गुणवंत विद्यार्थी पुरस्काराने सन्मानित करण्यात आले. अष्टपैलू संस्कृती कला अकादमी, मुंबई या राष्ट्रीय पातळीवर कला, संस्कृती, शिक्षण व क्रीडा क्षेत्रात कार्यरत असलेल्या संस्थेच्या वतीने आळंदी येथे पार पडलेल्या शानदार सोहळ्यात हा सन्मान आस्थाला प्राप्त झाला.
याप्रसंगी संस्थेचे अध्यक्ष शिवाजी खैरे, कार्याध्यक्ष प्रदीप बोराटे, कोषाध्यक्ष अनुसाया खैरे, उपाध्यक्ष नीलेश कसबेकर, सचिव सविता पाटील आणि रोहिदास भालशंकर यांच्या हस्ते तिला सन्मानचिन्ह व सन्मानपत्र देऊन गौरवण्यात आले. जुलै ते नोव्हेंबर २०२५ दरम्यान अकादमीने घेण्यात आलेल्या विविध स्पर्धांमध्ये आस्थाने उल्लेखनीय कामगिरी करत यश मिळवले होते.
आस्थाच्या या सुयशाबद्दल संस्थेचे चेअरमन महेंद्र पोटफोडे, संचालक मंडळ, मुख्याध्यापक दीपक जगताप तसेच शिक्षक व शिक्षकेतर कर्मचारी यांनी अभिनंदन करत पुढील वाटचालीसाठी शुभेच्छा दिल्या.

फोटो कॅप्शन : आस्था थिटे हिला पुरस्कार देऊन सन्मानित करताना मान्यवर