शस्त्रविक्रीसाठी आलेल्या अल्पवयीन आरोपीला अटक
दोन गावठी पिस्तुलांसह चार काडतुसे जप्त
ठाणे, ता. १९ : उत्तर प्रदेशमधून ठाण्यात अवैधरित्या शस्त्रविक्रीसाठी आलेल्या एका अल्पवयीन मुलाला ठाणे पोलिसांच्या खंडणी विरोधी पथकाने ताब्यात घेतले आहे. या कारवाईत पोलिसांनी दोन लाख १४ हजार रुपये किमतीची दोन गावठी बनावटीची पिस्तूल आणि चार जिवंत काडतुसे जप्त केली आहेत.

वागळे इस्टेट येथील साई पान शॉपसमोरील फुटपाथवर एक तरुण शस्त्रविक्रीसाठी येणार असल्याची खात्रीशीर माहिती खंडणी विरोधी पथकाला मिळाली होती. वरिष्ठ पोलिस निरीक्षक शैलेश साळवी यांच्या मार्गदर्शनाखाली पथकाने रविवारी (ता. १८) पहाटे पावणे सहाच्या सुमारास सापळा रचला. या वेळी संशयास्पद हालचाली करणाऱ्या एका अल्पवयीन मुलाला ताब्यात घेऊन त्याची अंगझडती घेतली असता, त्याच्याकडे ही अग्निशस्त्रे मिळून आली. ताब्यात घेतलेला मुलगा हा उत्तर प्रदेशमधील चित्रकूट जिल्ह्यातील रहिवासी आहे. इतक्या लहान वयात त्याच्याकडे ही शस्त्रे कोठून आली आणि तो ती कोणाला विकणार होता, याचा तपास आता पोलिस करत आहेत. दोन गावठी पिस्तूल, चार जिवंत काडतुसे असा एकूण किंमत दोन लाख १४ हजारांचा मुद्देमाल जप्त केला. वागळे इस्टेट पोलिस ठाण्यात याप्रकरणी गुन्हा दाखल केला असून, सहाय्यक पोलिस निरीक्षक सुनील तारमळे या प्रकरणाचा पुढील तपास करत आहेत.