ठाणे, ता. २० (बातमीदार) : माघ महिन्यातील शुक्ल पक्षातील चतुर्थीला साजऱ्या होणाऱ्या माघी गणेश जयंतीनिमित्त ठाणे जिल्ह्यासह मुंबई महानगर परिसरात जय्यत तयारी सुरू झाली आहे. गुरुवारी (ता. २२) गणरायांचे आगमन होणार आहे. यानिमित्त १० दिवस चालणाऱ्या माघी गणेशोत्सवासाठी घरगुती, तसेच सार्वजनिक मंडळांमधील भाविक मंगलमूर्तींच्या जय्यत तयारीला लागले आहेत.

गणरायाच्या स्वागतासाठी शहरातील बाजारपेठांमध्ये मोठ्या प्रमाणात गर्दी होत आहे. गणेशमूर्ती, पूजेचे साहित्य, फुले, सजावटीच्या वस्तू, वस्त्रे आणि पाट यांच्या मोठ्या प्रमाणावर खरेदी सुरू आहे. सराफ बाजार, स्थानिक बाजारपेठा तसेच उपनगरांतील दुकाने ग्राहकांनी फुलून गेली आहेत. अनेक भाविकांनी आधीच गणेशमूर्तीची नोंदणी केल्याचे मूर्तिकारांकडून सांगण्यात येत आहे. एक ते पाच फूट उंचीच्या मूर्तींची मागणी असून, त्यांची किंमत साधारणपणे दीड हजार ते अडीच हजार रुपयांपर्यंत आहे.

दोन हजारांहून अधिक गणेशमूर्तींची स्थापना
ठाणे जिल्ह्यासह संपूर्ण परिसरात माघी गणेशोत्सवाची जोरदार तयारी सुरू आहे. गेल्या काही वर्षांपासून माघ महिन्यात गणेश जयंती मोठ्या उत्साहात साजरी केली जात असून, यंदा गुरुवारी ठाणे जिल्ह्यात एकूण दोन हजार ४१९ गणेशमूर्तींची स्थापना होणार आहे. त्यात १५८ सार्वजनिक, तर २,२६१ खासगी मूर्तींचा समावेश आहे. ठाणे, भिवंडी, कल्याण-डोंबिवली, उल्हासनगर आणि वागळे इस्टेट परिसरात मोठ्या प्रमाणावर घरगुती व सार्वजनिक मंडळांमार्फत स्थापना केली जाणार आहे. उत्सवाच्या पार्श्वभूमीवर दादर, लालबाग, ठाणे व उपनगरातील बाजारपेठांमध्ये मोठी गर्दी दिसून येत आहे.

एकूण गणेशमूर्ती २,४१९
सार्वजनिक १५८
खासगी २,२६१