चिंतामणी मयुरेश्वरच्या दर्शनाची ओढ
वाड्यात माघी गणेश चतुर्थीनिमित्त जय्यत तयारी
वाडा, ता.२१(बातमीदार)ः माघी गणेश चतुर्थीनिमित्त महाराष्ट्रातील अष्टविनायक मंदिरे सज्ज झाली आहेत. याच अनुषंगाने प्रसिद्धीच्या झोतात नसलेले वाडा तालुक्यातील चिंचघरचे चिंतामणी मयुरेश्वर मंदिर प्रशासन देखील हजारो भाविकांच्या स्वागतासाठी सज्ज झाले आहे.
वाड्यातील चिंचघरचे चिंतामणी मयुरेश्वर मंदिर ठाणे, पालघर जिल्ह्यातील असंख्य भाविकांचे श्रद्धास्थान आहे.येथील तत्कालीन मंदिर साधे चौकोनी कौलारू, लाकडी जुन्या पद्धतीचे होते. नंतर चुन्याचा भितींचे देऊळ बांधण्यात आले. कालांतराने त्याची पडझड झाल्या नंतर नारायण भोईर, रामचंद्र पष्टे, पातल पाटील, महादू पाटील, डॉ.चौधरी, हरदास, वसंत गोगटे, म्हात्रे कुटुंबीय यांनी भाविकांच्या मदतीने १९६८- ६९ मध्ये मंदिराचा जीणोद्धार केला. नंतर विश्वस्त मंडळीनी अनेक सुधारणा केल्या. चिंतामणी मयुरेश्वर संस्थानात परंपरेप्रमाणे माघी गणेश जयंती मोठ्या उत्साहात साजरी होते. जिल्ह्यातील अनेक भाविकांचे श्रद्धास्थान असल्याने चतुर्थीला तसेच गणेश जयंती निमित्त भाविकांची मोठ्या संख्येने येतात.
---------------------------------
शिवकालीन इतिहास
शिवाजी महाराजांनी कोकण प्रांताकडे दुर्लक्ष होवू नये, म्हणून घाटावरील काही विश्वासू मंडळी त्यांच्या देवतासह कोकणात धाडली होती. चिंचघर येथील ब्राम्हणांचे मुळे, पाटोळे (पष्टे),भोईर कुटुंब वाड्यामध्ये आली. पुण्यातील चिंचवड सोडताना मोरया गोसाव्याने दिलेली चिंतामणी देवाची मूर्ती मुळे बंधूंचे मुळ पुरूष बाळकृष्ण मुळे यांना मिळालेल्या दुष्टांताप्रमाणे प्राणप्रतिष्ठा केली. चिंचघर गावाचे नाव चिंचवडवरून ठेवल्याचा इतिहास आहे.