रासळ ग्रामपंचायतीच्या टाळाटाळप्रकरणी ग्रामस्थांचा विजय
२८ जानेवारीपर्यंत माहिती देण्याचे प्रशासनाचे आश्वासन
पाली, ता. २१ (वार्ताहर) ः सुधागड तालुक्यातील रासळ ग्रुप ग्रामपंचायतीने माहिती अधिकारांतर्गत मागवलेली कागदपत्रे न देत टाळाटाळ केल्याप्रकरणी ग्रामस्थांच्या लढ्याला यश मिळाले आहे. पंचायत समिती स्तरावरील प्रथम अपिलीय सुनावणीत ग्रामविकास अधिकाऱ्यांनी माहिती २८ जानेवारीपर्यंत उपलब्ध करण्याचे लेखी आश्वासन दिले.
माहिती अधिकार कार्यकर्ते केतन म्हसके व ग्रामस्थांनी २९ सप्टेंबर २०२५ रोजी ग्रामसभा, मासिक सभांचे इतिवृत्त, बँक स्टेटमेंट व कॅश बुकची माहिती मागवली होती. नियमानुसार ३० दिवसांत माहिती देणे अपेक्षित असतानाही चार महिने उलटूनही माहिती न मिळाल्याने कार्यकर्त्यांनी संताप व्यक्त केला होता. याबाबत प्रशासकीय पारदर्शकतेवर प्रश्नचिन्ह निर्माण झाले होते.
सुनावणीसाठी सहाय्यक गटविकास अधिकारी अविनाश घरत उपस्थित होते. दोन ठिकाणचा अतिरिक्त कार्यभार असल्याने विलंब झाल्याचे ग्रामविकास अधिकाऱ्यांनी सांगितले.

चौकट
सीईओकडे दाद मागणार
माहिती मिळाल्यानंतर अनियमितता आढळल्यास जिल्हा परिषदेच्या मुख्य कार्यकारी अधिकारी नेहा भोसले यांची भेट घेऊन संबंधितांवर कारवाईची मागणी करणार असल्याचे केतन म्हसके यांनी सांगितले.

कोट

“माहिती देण्यास टाळाटाळ व सरपंचांचा दबाव पाहता ग्रामपंचायतीच्या कारभारात मोठ्या भ्रष्टाचाराचा संशय आहे. दिलेल्या मुदतीत माहिती न मिळाल्यास लढा अधिक तीव्र करू.”
– केतन म्हसके, अपीलकर्ता

फोटो ओळ
पाली : रासळ ग्रुप ग्रामपंचायत कार्यालय