महापौरपदावरून चर्चांना उधाण
वसई-विरार पालिकेत सर्वसाधारण प्रवर्गासाठी आरक्षण
विरार, ता. २२ (बातमीदार) ः वसई-विरार महापालिकेच्या महापौरपदासाठीचे आरक्षण खुला (सर्वसाधारण) प्रवर्गासाठी जाहीर झाले आहे. त्यामुळे हितेंद्र ठाकूर आता कोणाकडे महापौरपदाची जबाबदारी देणार, याची चर्चा रंगली आहे.
वसई-विरार महापालिकेचा कारभारी कोण होणार, याकडे साऱ्यांचे लक्ष लागून राहिले होते. अखेर आज महापौरपदासाठी खुला प्रवर्ग (सर्वसाधारण ) आरक्षण जाहीर करण्यात आले. त्यामुळे आता महापौर कोण होणार, याच्या चर्चा रंगू लागल्या आहेत. बहुजन विकास आघाडीच्या विजयात १६ जागा निवडून आणणाऱ्या अजीव पाटील, ज्येष्ठ नगरसेवक प्रफुल्ल साने, माजी महापौर प्रवीण शेट्टी, कन्हैया भोईर यांची नावे आघाडीवर आहेत.