चिंचघर येथे भक्तांचा मळा
वाडा, ता. २२ (बातमीदार) ः तालुक्यातील चिंचघर येथील पुरातन चिंतामणी मोरेश्वर मंदिर भाविकांचे श्रद्धास्थान आहे. या चिंतामणी मोरेश्वरला शिवकालीन इतिहास असून माघी गणेश जयंतीनिमित्त गुरुवारी (ता. २२) हजारो गणेशभक्तांनी मंदिरात दर्शन घेण्यासाठी गर्दी केली होती.
चिंतामणी मोरेश्वर संस्थांच्या वतीने परंपरेनुसार गणेश जयंती उत्सवाच्या वेगवेगळ्या प्रकारच्या कार्यक्रमांची रेलचेल दोन दिवसांपासून सुरू झाली होती. होमहवन, भजन, कीर्तन, प्रवचन, भक्तिगीते, भाविकांसाठी भंडाऱ्यात हजारो भाविक सहभागी झाले. येथे माघी गणेशोत्सवाला दर्शनासाठी मोठ्या प्रमाणात भाविकांची गर्दी होते. यंदा संस्थांच्या वतीने चोख व्यवस्था करण्यात आल्याने भाविकांची गैरसोय झाली नाही.