ध्यान-शाकाहार जनजागृतीसाठी जिल्हास्तरीय रॅली
नेरूळ, ता. २२ (बातमीदार) : आजच्या धावपळीच्या जीवनात मानसिक शांतता व आरोग्यदायी जीवनशैलीचा संदेश देण्यासाठी टिळक एज्युकेशन सोसायटीचे एस. के. कॉलेज ऑफ सायन्स अँड कॉमर्स (स्वायत्त) व एक्स्टेन्शन युनिट यांच्या संयुक्त विद्यमाने आणि मुंबई पिरॅमिड स्पिरिच्युअल सोसायटीच्या सहकार्याने ध्यान व शाकाहार जनजागृतीसाठी जिल्हास्तरीय रॅलीचे आयोजन करण्यात आले.
२१ जानेवारीला सकाळी ८ वाजता महाविद्यालय परिसरातून रॅलीची सुरुवात झाली. मुंबई व नवी मुंबईतील विविध महाविद्यालयांचे विद्यार्थी व स्वयंसेवक मोठ्या संख्येने सहभागी झाले. ध्यानातून मनःशांती व शाकाहारातून निरोगी जीवन या घोषणांनी परिसर दुमदुमून गेला.
रॅलीपूर्वी व नंतर घेण्यात आलेल्या ध्यान सत्रांमुळे सहभागींच्या मनाला शांतता लाभली. शाकाहाराचे आरोग्यविषयक महत्त्व तज्ज्ञांनी अधोरेखित केले. या उपक्रमाला प्राचार्या डॉ. स्वाती विटकर, उपप्राचार्या डॉ. शिखा पांडे, एनएसएस प्रोग्राम ऑफिसर प्रा. जीनल पांड्या व एक्सटेंशन युनिटच्या सर्व शिक्षक व विद्यार्थी तसेच पिरॅमिड स्पिरिचुअल सोसायटीचे राम बाबू व किरण गुरबानी यांचे मोलाचे सहकार्य लाभले.