रक्‍तदान शिबिराला प्रतिसाद
शिवडी, ता. २४ (बातमीदार) : माघी गणेश जयंतीनिमित्त मुंबई मराठी ग्रंथसंग्रहालय मार्गावरील नायगाव संलग्न परिसर सार्वजनिक गणेशोत्सव मंडळ (महागणपती श्री नायगावेश्वर) यांच्या वतीने आयोजित करण्यात आलेल्या सोहळ्याने परिसरात श्रद्धा व भक्तिभावाचे वातावरण निर्माण केले. मंडळाच्या सार्वजनिक गणेशोत्सवाचे यंदाचे ९७वे वर्ष असून, यानिमित्ताने रविवारी टाटा रुग्णालयाच्या सहकार्याने रक्तदान शिबिराचे आयोजन करण्यात आले होते. या शिबिरात सुमारे ११० रक्तदात्यांनी उत्स्फूर्त सहभाग घेत रक्तदान करून आपली सामाजिक बांधिलकी अधोरेखित केली. गणेशोत्सव हे केवळ धार्मिक उत्सव न राहता सामाजिक उपक्रमांचे प्रभावी माध्यम ठरत असल्याचे मत या वेळी उपस्थित मान्यवरांनी व्यक्त केले. याच अनुषंगाने मंडळाच्या वतीने विभागातील प्रतिष्ठित व्यक्तींच्या सेवेचा गुणगौरव करण्यात आला असून, सामाजिक सन्मानाची नवी परंपरा सुरू करण्यात आली आहे. या उपक्रमाच्या यशस्वी आयोजनात मंडळाचे अध्यक्ष अर्जुन गोपाळे, सचिव मयुरेश मोरे, खजिनदार सागर माने, सहाय्यक चिटणीस समीर माने तसेच विशाल पाटील यांचे योगदान महत्त्वपूर्ण ठरले.