कोंडीमुळे प्रवासी त्रस्त
श्रीवर्धन, ता. २४ (बातमीदार) : सलग तीन दिवस सुट्ट्यांमुळे शेकडो प्रवासी कोकणातील पर्यटनस्थळांकडे जात आहेत. तर माणगाव येथील एसटी बस स्थानकात प्रचंड गर्दी आणि इंदापूर-माणगाव राष्ट्रीय महामार्गावर वाहतूक कोंडीमुळे प्रवासी त्रस्त झाले आहेत.
शनिवारी (ता. २४) सकाळपासूनच माणगाव एसटी बस स्थानकात प्रवाशांची प्रचंड गर्दी होती. पुणे, मुंबई आणि इतर शहरांमधून सुट्टीचा आनंद घेण्यासाठी हजारो नागरिक कोकणाकडे निघाले होते. इंदापूर-माणगाव राष्ट्रीय महामार्गावरही वाहतुकीचा प्रचंड ताण होता. कोकणाकडे जाणारी आणि परत येणाऱ्यांची लांब रांग लागली होती. स्थानिक प्रशासन आणि वाहतूक पोलिसांनी वाहतुकीचे नियंत्रण करण्याचा प्रयत्न केला; परंतु प्रवाशांच्या मोठ्या संख्येमुळे संतुलन साधणे अवघड झाले. माणगाव बायपास रोड झाला तरच माणगावमधील कोंडीतून सुटका होणार आहे.