कासपाड्यातील विद्यार्थ्यांना शैक्षणिक मदत
कासा (बातमीदार)ः दुर्गम भागातील विद्यार्थ्यांमध्ये शिक्षणाची गोडी निर्माण करण्यासाठी जिल्हा परिषद शाळा उधवा कासपाडा येथे ग्रामकोश समितीच्या वतीने शाळेतील सर्व विद्यार्थ्यांना मोफत शालेय दप्तर आणि बूट-मोज्यांचे वाटप करण्यात आले. शालेय जीवनात साहित्याची कमतरता अडथळा ठरू नये, या उदात्त हेतूने स्थानिक समितीने हा पुढाकार घेतला. या वेळी सागरशेत पेसा समितीचे अध्यक्ष संतोष दळवी, सदस्य सीता रावते, शाळा व्यवस्थापन समितीचे अध्यक्ष विजय विल्हात, अंगणवाडी सेविका मनीषा शिंगडा, लहाणू दळवी, जयराम घोरखना, राकेश दळवी, आशा कार्यकर्ती सीता टोकरे, दर्शना दळवी आणि मुख्याध्यापक शाहू संभाजी भारती उपस्थित होते.