हंगामी फळभाज्यांचे विरारमध्ये प्रदर्शन
विरार, ता. २५ (बातमीदार) ः विष्णू वामन ठाकूर चॅरिटेबल ट्रस्ट उत्कर्ष विद्यालय मराठी माध्यम प्राथमिक विभागातर्फे सुगी महोत्सवानिमित्त हंगामी फळभाज्यांचे प्रदर्शन भरवण्यात आले होते. सण, विज्ञान यांची सांगड घालण्यासाठी हा उपक्रम करण्यात आला.
या मोसमात उपलब्ध असणाऱ्या फळे व भाज्यांची माहिती प्रदर्शनाच्या माध्यमातून देण्यासाठी उपक्रम करण्यात आला. भाज्यांची, फळांची नावे, त्यांची माहिती, शरीरास होणारे उपयोग विद्यार्थ्यांनी सांगितले. या प्रदर्शनाच्या निमित्ताने विद्यार्थ्यांना आहार, आरोग्याबाबत मार्गदर्शन करून खाण्याच्या चांगल्या सवयी, जंक फूडचे शरीरावर होणारे घातक परिणाम याबाबत माहिती देण्यात आली. शाळेतील शिक्षिका उषा भावसार, नाझिया शेख, वृषाली पाटील यांनी विद्यार्थ्यांची तयारी करून घेतली. विज्ञान व पर्यावरण विषयाच्या समूहातील विद्यार्थ्यांनी प्रदर्शनाच्या तयारीसाठी मेहनत घेतली होती.