मिरा-भाईंदरची महापौर निवड ३ फेब्रुवारीला
भाईंदर, ता.२५ (बातमीदार): मिरा भाईंदर महापालिकेच्या महापौर पदासाठी येत्या ३ फेब्रुवारीला निवडणूक होणार आहे. मिरा भाईंदरचे महापौर पद सर्वसाधारण महिलांसाठी राखीव झाले आहे. ९५ पैकी भाजपकडे ७९ संख्याबळ असल्याने महापौर भाजपचाच होणार, हे निश्चित आहे. मात्र, कोणत्या महिला नागरसेविकेला मिळणार याबाबत राजकीय वर्तुळात उत्सुकता आहे. महापौर निवडणुकीसाठी मुंबई उपनगर जिल्हाधिकारी सौरभ कटियार पीठासीन अधिकारी म्हणून उपस्थित रहाणार आहेत. दरम्यान महापालिका प्रशासनाकडून नवनिर्वाचित नगरसेवकांचे स्वागत करण्याची तयारी पूर्ण झाली आहे. महासभेच्या सभागृहाचे नूतनीकरण पूर्ण करण्यात आले आहे. महापौर, उपमहापौर त्याचप्रमाणे अन्य पदाधिकाऱ्यांची दालने सज्ज करण्यात येत आहेत. २०२२ मध्ये महापालिकेची मुदत संपुष्टात आल्यापासून सुमारे साडेतीन वर्षे ही दालने पदाधिकाऱ्यांची प्रतिक्षेत होती.