एस. एम. जी. विद्यामंदिरात वार्षिक क्रीडा पारितोषिक वितरण उत्साहात
दिवा, ता. २७ : ओम साई शिक्षण संस्था संचलित एस. एम. जी. विद्यामंदिर, प्राथमिक विभागाचा शैक्षणिक वर्षाचा वार्षिक क्रीडा पारितोषिक वितरण समारंभ शनिवारी (ता. २४) उत्साहात पार पडला. या समारंभाचे उद्‍घाटन प्राचार्य मुकेश पांडे आणि प्राथमिक विभागाचे मुख्याध्यापक अनंत धाडवे यांच्या हस्ते करण्यात आले.
कार्यक्रमाच्या प्रारंभी विद्यालयाच्या विद्यार्थ्यांनी मार्च करून प्रमुख पाहुण्यांचे स्वागत केले. यानंतर विद्यार्थ्यांनी विविध मानवी मनोरे रचून प्रमुख पाहुण्यांना मानवंदना दिली. तसेच विद्यार्थ्यांनी सादर केलेल्या विविध क्रीडाविषयक नृत्याविष्कारांनी संपूर्ण कार्यक्रमात रंगत आणली. या समारंभात पालकांचा सक्रिय सहभाग होता. पालकांनीही विविध खेळांमध्ये उत्स्फूर्तपणे भाग घेत उत्कृष्ट कामगिरी करून पारितोषिके मिळवली. मान्यवरांच्या हस्ते विद्यालयातील सर्व गुणवंत विद्यार्थ्यांना पारितोषिके व पदके देऊन सन्मानित करण्यात आले.
या समारंभास प्रमुख अतिथी म्हणून नवनिर्वाचित नगरसेविका स्नेहा पाटील आणि ओम साई शिक्षण संस्थेचे सचिव स्वप्नील गायकर हे उपस्थित होते. संस्थेचे सचिव स्वप्नील गायकर यांनी विद्यार्थ्यांनी क्रीडा स्पर्धांमध्ये केलेल्या प्रभावी कामगिरीबद्दल गौरवोद्गार काढले. विद्यालयाचे मुख्याध्यापक अनंत धाडवे यांनी विद्यार्थ्यांना संबोधित करताना निरोगी जीवनासाठी खेळांचे महत्त्व विशद केले.
हा कार्यक्रम यशस्वी होण्यासाठी क्रीडा शिक्षक गणेश राठोड व भीवसेन मसूरकर यांनी विशेष परिश्रम घेतले. तसेच कार्यक्रम नियोजन समिती, विद्यालयातील सर्व शिक्षक व शिक्षकेतर कर्मचारी यांनी मोलाचे सहकार्य केले.