आंतरकार्यालयीन क्रिकेट स्पर्धेत फ्लेक्सो लिंग संघाचा दणदणीत विजय
ठाणे, ता. २७ (बातमीदार) : नोबल प्रिंटिंग प्रेस यांच्या वतीने आयोजित मर्यादित षटकांच्या आंतरकार्यालयीन क्रिकेट स्पर्धेत फ्लेक्सो लिंग-लेबल डिव्हिजन संघाने उत्कृष्ट कामगिरी करीत विजेतेपदावर आपले नाव कोरले. अंतिम सामन्यात त्यांनी ड्रिम एकादश संघाचा २७ धावांनी पराभव केला. प्रथम फलंदाजी करताना ड्रिम एकादशच्या भेदक गोलंदाजीमुळे फ्लेक्सो लिंग संघाला पाच बाद ६८ धावाच करता आल्या. मात्र त्यानंतर फ्लेक्सो लिंगच्या गोलंदाजांनी शानदार मारा करीत ड्रिम एकादशला सहा बाद अवघ्या ४२ धावांत रोखले. विजेत्या संघाला चषक आणि ११,००१ रुपयांचे, तर उपविजेत्या संघाला चषक आणि ५,००१ रुपयांचे रोख बक्षीस देऊन गौरविण्यात आले.