पालिकेच्या अर्थसंकल्पाला यंदा विलंब
अर्थसंकल्प आठ ते दहा टक्क्यांनी वाढणार
सकाळ वृत्तसेवा
मुंबई, ता. २७ : मुंबई महापालिकेच्या अर्थसंकल्पाची लगबग सुरू असून, यंदाचा २०२६-२७चा अर्थसंकल्प १० दिवस उशिरा सादर होण्याची शक्यता आहे. पालिका निवडणुकीमुळे अर्थसंकल्पाला विलंब होणार असून, यंदा त्यात आठ ते दहा टक्क्यांनी वाढ होण्याची शक्यता सूत्रांनी व्यक्त दिली.
मुंबई महापालिकेतील नगरसेवकांचा कार्यकाळ ७ मार्च २०२२ला संपुष्टात आला. तेव्हापासून प्रशासकीय राजवट असल्याने २०२३-२४, २०२४-२५ आणि २०२५-२६ या वर्षीचा अर्थसंकल्प प्रशासक म्हणून आयुक्तांनी सादर केला होता. गतवर्षीचा अर्थसंकल्प ७४ हजार ४२७ कोटींचा होता. यंदा त्यात आठ ते दहा टक्के वाढ होण्याची दाट शक्यता आहे. दरवर्षी ३१ जानेवारी किंवा ४ फेब्रुवारीपर्यंत अर्थसंकल्प जाही होतो; मात्र यंदा महापालिका निवडणुकीमुळे अर्थसंकल्पास विलंब होणार आहे. दर पाच वर्षांनी आचारसंहितेमुळे अर्थसंकल्प सादर करण्यास आठ-दहा दिवस पुढे ढकलण्याची तरतूद पालिकेच्या अधिनियमात असल्याचे पालिकेच्या सूत्रांनी सांगितले.