महाराष्ट्राच्या विकासाच्या रथाचे एक चाक निखळले
कपिल पाटील यांनी वाहिली ''दादां''ना श्रद्धांजली
भिवंडी, ता. २८ (वार्ताहर): गोरगरिबांचा कैवार घेणारा आणि महाराष्ट्राच्या विकासात मोलाचे योगदान देणारा एक धाडसी नेता आपण गमावला आहे, अशा शब्दांत माजी केंद्रीय राज्यमंत्री कपिल पाटील यांनी उपमुख्यमंत्री अजित पवार यांच्या निधनावर शोक व्यक्त केला आहे. बारामती येथील दुर्दैवी विमान अपघातात अजितदादांच्या निधनाचे वृत्त समजताच कपिल पाटील यांनी त्यांना भावपूर्ण श्रद्धांजली अर्पण केली.

अजितदादांच्या कार्यशैलीवर भाष्य करताना कपिल पाटील म्हणाले की, दादा हे नाव त्यांना वडिलकीच्या नात्याने मिळाले असले, तरी खऱ्या अर्थाने ते महाराष्ट्रासाठी ''विकासाचे दादा'' म्हणून ओळखले जात होते. त्यांच्या निर्णयक्षमतेमुळे राज्याच्या प्रगतीला वेग मिळाला होता. त्यांच्या जाण्याने केवळ पवार कुटुंबावरच नव्हे, तर समस्त महाराष्ट्रावर दुःखाचा डोंगर कोसळला आहे." महाराष्ट्राच्या विकासाच्या रथाचे एक महत्त्वाचे चाक आज निखळून पडले आहे. असा परखड आणि कर्तव्यदक्ष नेता पुन्हा होणे नाही, असेही पाटील यांनी नमूद केले. अजितदादांच्या जाण्याने राजकीय आणि प्रशासकीय क्षेत्रात जी पोकळी निर्माण झाली आहे, ती कधीही भरून न निघणारी असल्याचे त्यांनी सांगितले.