वागळे इस्टेटमधील बंद कंपनीत चोरी करणारी चौकडी जेरबंद
सकाळ वृत्तसेवा
ठाणे, ता. २८ : शहरातील वागळे इस्टेट परिसरात एका बंद कंपनीतील चोरी करणाऱ्या चौकडीला जेरबंद करण्यात पोलिसांना यश आले आहे. विशाल जाधव (२६), अलाउद्दीन सय्यद (२८), अक्षय क्षिरसागर (२९) व संजय किरके (२६) या तिघांना रंगेहाथ पकडण्यात आले. या चोरीत सुमारे एक लाख ५० हजार रुपयांचा माल लंपास केल्याची कबुली त्यांनी दिल्याचे पोलिसांनी सांगितले.
वागळे इस्टेट रूपादेवी पाडा येथे एन.आर.डब्ल्यू. पॉलिमर्स प्रा.लि. कंपनीचे मॅनेजर धर्मेश सोनावणे (२९) यांनी याप्रकरणी तक्रार दाखल केली होती. ही कंपनी मागील एक महिन्यापासून बंद असून तिची देखरेख सोनावणे करत असून एक सुरक्षारक्षक आहेत. सोमवारी (ता. २६) सोनावने कंपनीच्या पाहणीस गेले असता काचेच्या खिडक्या फुटलेल्या, ॲल्युमिनियमचा दरवाजा तुटलेला व शटर उघडे असल्याचे आढळून आले. म्हणून आत तपासणी केली असता लोखंडी सळई, लोखंडी पाण्याचे पाईप, ॲल्युमिनियम पट्ट्या व वायरिंग असा दीड लाखांचा माल चोरीला गेल्याचे निदर्शनास आले. सोनावणे व त्यांच्या मित्रांनी घटनास्थळी नजर ठेवली असता, मंगळवारी (ता. २७) चार व्यक्ती कंपनीत चोरी करताना आढळून आले. याबाबत तात्काळ वागळे इस्टेट पोलिसांना माहिती दिल्यावर पोलिस घटनास्थळी दाखल होत चौघांना ताब्यात घेतले. चौकशीत त्यांनी यापूर्वीही चोरी केल्याची कबुली दिली. या प्रकरणी वागळे इस्टेट पोलिस ठाण्यात गुन्हा दाखल करण्यात आला असून पुढील तपास वरिष्ठ पोलिस निरीक्षक शिवाजी गवारे यांच्या मार्गदर्शनाखाली सुरू आहे.