अंधेरी पश्चिमेतील फेरीवाल्यांवर कारवाई

सकाळ वृत्तसेवा
मुंबई, ता. ३० ः अंधेरी (पश्चिम) येथील राम गणेश गडकरी मार्ग (इर्ला मार्ग) परिसरातील सुमारे २०० अनधिकृत फेरीवाले, पदपथांवरील अनधिकृत वाढीव बांधकामांवर पालिकेच्या ‘के पश्चिम’ विभागाकडून कारवाई करण्यात आली.
पालिका आयुक्त भूषण गगराणी यांच्या निर्देशांनुसार, उपआयुक्त भाग्यश्री कापसे यांच्या मार्गदर्शनात, सहाय्यक आयुक्त (के पश्चिम विभाग) चक्रपाणी अल्ले यांच्या नेतृत्वात गुरुवारी (ता. २९) ही कारवाई करण्यात आली. अंधेरी (पश्चिम) भागातील स्वामी विवेकानंद मार्ग आणि गुलमोहर मार्गाला जोडून असलेल्या तसेच कूपर रुग्णालयाच्या प्रवेश मार्गाशी संलग्न असलेल्या राम गणेश गडकरी मार्गावरील पदपथांवर अनधिकृत वाढीव बांधकामे आढळून आली होती. तसेच या परिसरात अनधिकृत फेरीवाल्यांनीही दुकाने उभी केल्याचे निदर्शनास आले होते. यामुळे कूपर रुग्णालयात आणीबाणीप्रसंगी रुग्णांना घेऊन येणाऱ्या रुग्णवाहिकांना मार्गक्रमण करण्यास तसेच पादचाऱ्यांना पदपथांवरून चालण्यास अडथळा निर्माण होत होता. या पार्श्वभूमीवर पालिकेच्या ‘के पश्चिम’ विभागाकडून निष्कासनाची मोहीम हाती घेण्यात आली. याअंतर्गत या परिसरातील सुमारे २०० अनधिकृत फेरीवाले तसेच पदपथांवरील अनधिकृत वाढीव बांधकामांचे निष्कासन करण्यात आल्याची माहिती पालिकेने दिली.