सायन उड्डाणपुलाचे काम १५ जुलैपूर्वी पूर्ण होणार
पालिका प्रशासनाची ग्वाही

सकाळ वृत्तसेवा
मुंबई, ता. ३० : शीव (सायन) उड्डाणपुलाचे काम वेगात सुरू असून, १५ जुलैपर्यंत सर्व कामे पूर्ण होऊन तो वाहतुकीसाठी खुला केला जाईल, अशी ग्वाही पालिकेचे अतिरिक्त महापालिका आयुक्त (प्रकल्प) अभिजित बांगर यांनी दिली.
शीव पूर्व-पश्चिम भागांना जोडणाऱ्या रेल्वे उड्डाणपुलाच्या पुनर्बांधणी प्रकल्‍प स्‍थळाची अभिजित बांगर यांनी काल (ता. २९) पाहणी केली. त्या वेळी बांगर यांनी हे निर्देश दिले. या पाहणी दौऱ्यात प्रकल्प कामाची सद्य:स्थिती, उर्वरित कामाचे टप्पे आणि त्यांची कालमर्यादा निश्चित करण्यात आली. पादचाऱ्यांना पूर्व-पश्चिम येण्या-जाण्यासाठी पादचारी पूल कार्यान्वित करण्‍यात आला आहे. दोन भुयारी पादचारी मार्गांपैका एक भुयारी पादचारी मार्ग पूर्ण झाला आहे. येत्‍या पंधरवड्यात तो कार्यान्वित करण्‍यात येईल. याच पद्धतीने महापालिका आणि रेल्‍वे प्रशासनामार्फत केली जाणारी कामे अधिकाधिक समांतर पद्धतीने करावीत, प्रकल्‍पाच्‍या कालमर्यादेचे पालन करावे, असे निर्देश बांगर यांनी दिले आहेत. शीव पुलाचे रेल्वे हद्दीतील काम रेल्वे विभाग आणि पोहोच मार्ग, दोन पादचारी भुयारी मार्ग इत्यादींचे काम पालिका करीत आहे. लाल बहादूर शास्त्री मार्गावरील भुयारी मार्गाचे काम पूर्ण झाले आहे. हा भुयारी पादचारी मार्ग कार्यान्वित झाल्‍यानंतर रेल्‍वे पुलाच्‍या पश्चिमेकडील पादचारी वाहतुकीची फेरआखणी करावी. पश्चिमेकडील अधिकाधिक भाग कामासाठी उपलब्‍ध व्‍हावा, असे नियोजन करावे. पश्चिमेकडील कामाचे चार टप्‍पे असून, या चारही टप्‍प्‍यांच्‍या पूर्णत्‍वाचे सूक्ष्‍म नियोजन करण्‍यात आले असल्याची माहिती बांगर यांनी दिली.
...
समन्वय साधा!
पालिका प्रशासन आणि रेल्वे प्रशासनाने परस्पर समन्वय साधून प्रामाणिकपणे काम करावे, असे सांगत नागरिकांची असुविधा लवकरात लवकर दूर होईल, असेदेखील बांगर यांनी या वेळी नमूद केले.