जुन्या जीर्ण बस स्थानकांमुळे बेलापूरमधील नागरिक त्रस्त
अत्याधुनिक बस स्थानके उभारण्याची मागणी
बेलापूर, ता. ३१ (बातमीदार)ः नवी मुंबईसारख्या स्मार्ट शहरात सर्व सोयीसुविधा उपलब्ध असून, मागील काही वर्षांत टप्प्याटप्प्याने बस स्थानकेदेखील अत्याधुनिक करण्यात आली आहेत. मात्र, बेलापूर सेक्टर १,२ येथील काही बस स्थानके आजही जुन्या, जीर्ण अवस्थेत असून, असुविधांमुळे नागरिकांना रस्त्यावर उभे राहत बस पकडावी लागत आहे.
बेलापूर येथील नागरिकांना बस सुविधा सलग असल्याने नागरिकांचा मोठा कल बस प्रवासाकडे असतो. मात्र, बेलापूर परिसराअंतर्गत धावणाऱ्या बस नियमित अधिक संख्येने असल्या तरी, प्रवासादरम्यान जुन्या, जीर्ण, मोडकळीस आलेली आसने यांमुळे बस स्थानके असुविधांची ठरत आहेत. दरम्यान, इतरत्र डिजिटल पद्धतीची आलिशान बस स्थानके असताना बेलापूर परिसरातील काही बस स्थानके मात्र असुविधांचे माहेरघर ठरत आहेत. परिणामी, बेलापूर येथील सेक्टर १,२ परिसरातील जुनी बस स्थानके काढून नवी अत्याधुनिक बस स्थानके उभारण्याची मागणी नागरिक करत आहेत.