अस्मिता विद्यालयाचे वर्चस्व कायम
जोगेश्‍वरीतील आंतरशालेय मिनी मॅरेथॉनला उत्स्फूर्त प्रतिसाद

जोगेश्‍वरी, ता. १ (बातमीदार) : संजय स्पोर्ट्स अकॅडमी व मुंबई ॲमॅचर ॲथलेटिक्स असोसिएशन यांच्या संयुक्त विद्यमाने आयोजित करण्यात आलेल्या आंतरशालेय मिनी मॅरेथॉन स्पर्धेला विद्यार्थ्यांनी उत्स्फूर्त प्रतिसाद दिला. रविवारी सकाळी झालेल्या या स्पर्धेत जोगेश्वरी परिसरातील १८ शाळांमधील सुमारे १,४०० विद्यार्थ्यांनी सहभाग घेतला होता. अस्मिता विद्यालयाने सलग चौथ्या वर्षी चॅम्पियन ट्रॉफी पटकावून आपले वर्चस्व कायम राखले.
स्पर्धा रोड रेस (एकात्मता दौड) स्वरूपाची असून, विद्यार्थ्यांमध्ये क्रीडा संस्कृती रुजवणे, शारीरिक तंदुरुस्ती वाढवणे व सामाजिक सलोखा जोपासणे हा या उपक्रमाचा मुख्य उद्देश होता. विद्यार्थ्यांच्या वयोगटानुसार स्पर्धेसाठी तीन मॅरेथॉन मार्ग निश्चित करण्यात आले होते. इयत्ता आठवी ते दहावीच्या मुला-मुलींसाठी तीन किमी, इयत्ता पाचवी ते सातवीच्या मुला-मुलींसाठी दोन किमी, तर लहान गटासाठी एक किमी मॅरेथॉन घेण्यात आली. सर्व मार्गांची सुरुवात व समाप्ती इस्माईल युसूफ कॉलेज गेट क्रमांक २ येथे होती. स्पर्धा मॅरेथॉन धावपटू व आयोजक संजय चिंदरकर यांच्या मार्गदर्शनाखाली यशस्वीरीत्या पार पडली.

फोटो - 234