विद्यार्थ्यांना स्पर्धा परीक्षेचे धडे

वाणगाव (बातमीदार) ः आसनगाव येथील स्वाती पाटील बॅचलर ऑफ फॅशन डिझाइन महाविद्यालयात स्पर्धा परीक्षांना सामोरे कसे जावे, याबाबत मार्गदर्शन करण्यात आले. या वेळी कृषी प्रतिष्ठानचे अध्यक्ष मिलिंद पाटील यांनी उपस्थित विद्यार्थ्यांना मार्गदर्शन केले. स्पर्धा परीक्षेत ग्रामीण भागातील विद्यार्थी ज्या दिवशी मोठ्या संख्येने यशस्वी होतील, तो दिवस आपल्यासाठी महत्त्वाचा असेल. येथून पुढील काळात ग्रामीण विद्यार्थ्यांनी या परीक्षेत मोठ्या प्रमाणात सहभाग नोंदवावा, असे आवाहन पाटील यांनी उपस्थित विद्यार्थ्यांना केले. केंद्रीय लोकसेवा आयोग व महाराष्ट्र लोकसेवा आयोगामार्फत घेण्यात येणाऱ्या विविध परीक्षा, सरळसेवा परीक्षांविषयी ग्रामीण भागातील विद्यार्थ्यांना तज्ज्ञांचे मार्गदर्शन मिळावे, हा या मार्गदर्शन कार्यक्रमाचा हेतू होता.
या वेळी प्रमुख मार्गदर्शक म्हणून स्पर्धा परीक्षातज्ज्ञ डॉल्बी मोरे उपस्थित होत्या. कार्यकारी संचालिका तृप्ती पाटील, विभागप्रमुख प्रा. वैष्णवी करपे, समन्वयक प्रा. शिल्पी झा, प्रा. तेजस जाधव व विद्यार्थी मोठ्या संख्येने उपस्थित होते.