वज्रेश्वरी, ता. २ (बातमीदार) : परिसरातील साखर पाडा येथे अनेक वर्षांपासून पिण्याच्या पाण्याची तीव्र टंचाई भासत होती. आता येथे नळ पाणीपुरवठा योजनेला सुरुवात करण्यात आल्याने ही टंचाई दूर होणार आहे.
पाणी समस्येमुळे येथील नागरिक, विशेषतः महिला मोठ्या प्रमाणावर त्रस्त होत्या. पाणी मिळवण्यासाठी महिलांना दररोज डोक्यावरून हंडे वाहत दूरवर जावे लागत होते, ही परिस्थिती अत्यंत कष्टदायक आणि आरोग्यास मारक ठरत होती. या गंभीर समस्येची दखल घेत लायन्स क्लब ऑफ नॉर्थ बॉम्बे आणि जाणिव प्रतिष्ठान यांच्या माध्यमातून नागरिकांच्या अडचणी समजून घेण्यात आल्या. त्यानंतर तत्काळ पुढाकार घेत साखर पाडा येथे नळ पाणीपुरवठा योजनेला सुरुवात करण्यात आली. या कार्यक्रमावेळी गावातील महिलांची उपस्थिती लक्षणीय होती. ‘आता डोक्यावरचा हंडा उतरणार’, या भावनेने महिलांच्या चेहऱ्यावर समाधानाचा आणि आनंदाचा भाव स्पष्टपणे दिसून येत होता. नळ पाणीपुरवठा सुरू झाल्याने महिलांचा वेळ, श्रम यांची मोठ्या प्रमाणावर बचत होणार असून, गावातील जीवनमानात सकारात्मक बदल घडून येणार आहे. पाण्यासारख्या मूलभूत गरजेची पूर्तता झाल्याने साखर पाडा येथील नागरिकांमध्ये समाधानाचे वातावरण निर्माण झाले आहे.