कुर्ला परिसरात गर्दुल्ल्यांचा सुळसुळाट; रहिवासी त्रस्त
तत्काळ कडक बंदोबस्ताची मागणी
चेंबूर, ता. २ (बातमीदार) : कुर्ला येथील शीतल तलाव आणि संदेश नगर परिसर सध्या गर्दुल्ल्यांचा अड्डा बनल्याने स्थानिक रहिवाशांमध्ये तीव्र अस्वस्थता पसरली आहे. परिसरातील काही मार्गांवर तळीराम खुलेआम मद्यपान करत बसत असल्याने नागरिकांना नाहक त्रास सहन करावा लागत असून, महिलांच्या सुरक्षेचा प्रश्न ऐरणीवर आला आहे.
पालिकेने काही वर्षांपूर्वी शीतल तलावाचे सुशोभीकरण केले होते. मात्र, सध्या तलावाच्या परिसरात गर्दुल्ल्यांनी ठाण मांडल्याचे चित्र आहे. तसेच संदेश नगर परिसरात मिठी नदीजवळ अंधाराचा फायदा घेत मद्यपान सुरू असल्याचे रहिवाशांचे म्हणणे आहे.
याच परिसरातील एका वाइन्स दुकानासमोरील मार्गावर राजरोसपणे मद्यपान होत असल्याने नागरिकांच्या सुरक्षिततेबाबत गंभीर प्रश्नचिन्ह निर्माण झाले आहे. संदेश नगर परिसरात काही वर्षांपूर्वी एका तरुणीवर चार-पाच जणांनी सामूहिक बलात्कार केल्याची घटना घडली होती. अशा घटनेची पुनरावृत्ती होण्याची भीती स्थानिक रहिवाशांकडून व्यक्त केली जात आहे. ‘‘एखादी गंभीर घटना घडल्यावरच पोलिस प्रशासन जागे होणार का,’’ असा सवाल रहिवाशांनी उपस्थित केला आहे. याबाबत वारंवार तक्रारी करूनही पोलिस प्रशासनाकडून ठोस कारवाई होत नसल्याचा आरोप स्थानिकांनी केला आहे. या परिसरात तातडीने कडक पोलीस बंदोबस्त ठेवावा आणि गर्दुल्ल्यांचा त्वरित बंदोबस्त करावा अन्यथा तीव्र आंदोलन छेडण्याचा इशारा स्थानिक रहिवाशांनी दिला आहे.