वंदे भारत कोस्टल सायक्लोथॉनची उत्सुकता
नायगावात १० फेब्रुवारीला दाखल होणार, स्वागताची जय्यत तयारी
विरार, ता. ४ (बातमीदार) ः भारत सरकारच्या केंद्रीय औद्योगिक सुरक्षा दलाच्या वतीने होणारी वंदे भारत कोस्टल सायक्लोथॉन २०२६ मोहीम १० फेब्रुवारीला जूचंद्र चंद्रपाडा वाकीपाडा-बापाणे येथे दाखल होत आहे. यानिमित्ताने जूचंद्र ग्रामदेवी न्यासाच्या वतीने जय्यत तयारी सुरू आहे.
भारत सरकारच्या विविध प्रशासकीय व शासकीय अधिकाऱ्यांचा या मोहिमेत सक्रिय सहभाग आहे. देशाच्या सागरी सुरक्षिततेबाबत जनजागृती करणे, या उपक्रमाचा मुख्य उद्देश आहे. या राष्ट्रीय सायक्लोथॉन मोहीम मंगळवारी (ता. १०) सायंकाळी ४ वाजता स्वातंत्र्यसैनिक, कलावंतांची परंपरा लाभलेल्या जूचंद्र गावासह चंद्रपाडा, वाकीपाडा, बापाणे गावांमध्ये आगमन होणार आहे. यानिमित्ताने श्री चंडिका देवी मंदिराच्या प्रांगणात विशेष सांस्कृतिक कार्यक्रम होणार आहेत. या कार्यक्रमात देशभक्तीपर गीत, लोकनृत्य व पारंपरिक सांस्कृतिक सादरीकरण केले जाणार आहे. या माध्यमातून राष्ट्रप्रेम, सागरी सुरक्षेचे महत्त्व, एकात्मतेची भावना रुजवण्याचा प्रयत्न केला जाणार आहे.
----------------------------
जूचंद्र न्यासाचा पुढाकार
या राष्ट्रीय कार्यक्रमाच्या यशस्वी आयोजनासाठी श्री ग्रामदेवी जूचंद्र न्यासाच्या वतीने सर्व तयारी पूर्ण करण्यात आली आहे. ग्रामस्थ, स्थानिक संस्था व स्वयंसेवक मोठ्या उत्साहात सहभागी होण्याचे आवाहन करण्यात आले आहे. त्यामुळे हा स्वागत निश्चितच स्मरणीय ठरणार आहे.