विद्याभवनच्या विद्यार्थ्यांनी नाटिकेतून दिला पर्यावरणाचा संदेश
नेरूळ, ता. १० (बातमीदार) : पुणे विद्यार्थी गृहाच्या नेरूळ येथील विद्याभवनच्या विद्यार्थ्यांनी रोटरी क्लब ऑफ नवी मुंबई यांच्या वतीने ज्वेल ऑफ नवी मुंबई येथे आयोजित ‘हॅपी स्ट्रीट्स’ उपक्रमात पर्यावरण संरक्षण व वैश्विक पंचतत्त्वे या विषयांवर आधारित दोन प्रभावी नाटिका सादर केल्या. या सादरीकरणांना उपस्थित प्रेक्षकांनी उत्स्फूर्त प्रतिसाद दिला. या उपक्रमात फिटनेस, सामाजिक बांधिलकी व मैत्रीभाव यांचा सुंदर संगम अनुभवायला मिळाला.
कार्यक्रमात रोटेरियन सदस्य, त्यांचे कुटुंबीय व नवी मुंबईतील नागरिक मोठ्या संख्येने सहभागी झाले होते. भारतीय योग संस्थानच्या योग प्रात्यक्षिकांनंतर ब्लिस अकॅडमीच्या झुंबा सत्राने वातावरणात उत्साह निर्माण केला. टिसर आर्टिजन फोरम व स्क्रॅपजी यांनी पुनर्वापर व ई-वेस्ट व्यवस्थापनाबाबत जनजागृती केली. डॉ. अंकिता सावंत यांनी फिजिओथेरपी व आरोग्यदायी जीवनशैलीवर मार्गदर्शन केले. कार्यक्रमाचे नियोजन रोटेरियन मोहन देशकर यांनी केले असून अनेक मान्यवरांची उपस्थिती लाभली.